Gweithgareddau Cysylltu a Chwarae

Caiff ein rhaglenni eu llunio’n ofalus i ganolbwyntio ar sgiliau cyfathrebu, rhyngweithio a chwarae’r plant

Rydym yn cynnig amrywiaeth o weithgareddau yn ystod y tymor a thrwy gydol y gwyliau. Mae ein gweithgareddau’n digwydd mewn llawer o wahanol leoliadau fel bod cymaint o bobl ag sy’n bosibl yn gallu cael mynediad iddynt.

Mae ein sesiynau’n canolbwyntio ar ddatblygu sgiliau cyfathrebu, rhyngweithio a chwarae ac ar gynorthwyo a grymuso teuluoedd fel eu bod yn teimlo’n ddigon hyderus i roi cynnig ar bethau newydd gyda’u plentyn gartref.

Mae ein sesiynau yn ystod y tymor yn cynnwys rhaglenni cymorth wedi’u targedu ar gyfer teuluoedd sy’n chwilio am gymorth rheolaidd, penodol. Rydym hefyd yn cynnig sesiynau galw heibio i’r sawl y mae angen amserlen fwy hyblyg arnynt, sy’n addas i’w trefn arferol nhw. Gallwch gael gwybod mwy am bob un o’n sesiynau isod, neu ewch i’n cyfleuster dod o hyd i weithgaredd i gael mwy o wybodaeth a chadw eich lle.

Clwb ar ôl ysgol

Mae ein sesiynau ar ôl ysgol yn ffordd wych o gwrdd a chysylltu â theuluoedd eraill, a chymryd rhan ar yr un pryd mewn gweithgareddau newydd bob wythnos sy’n datblygu sgiliau cyfathrebu, rhyngweithio a chwarae.

Ymlacio a sgwrsio

Dewch i fwynhau paned a sgwrs mewn amgylchedd cyfeillgar a chefnogol. Mae ein sesiynau Ymlacio a Sgwrsio yn gyfle i gwrdd â theuluoedd eraill, creu ymdeimlad o gymuned a rhannu cyngor.

Gweithdai wedi’u targedu

Drwy gydol y flwyddyn, rydym yn gweithio gyda siaradwyr gwadd i gynnig ystod o weithdai wedi’u targedu. Bydd pob un ohonynt yn cynnig cyfle i archwilio meysydd cymorth penodol yn fanwl er mwyn eich helpu i feithrin sgiliau newydd, cael gwybodaeth newydd a magu hyder.

Ysgol goedwig

Yn yr ysgol goedwig, rydym yn canolbwyntio ar ddatblygu sgiliau chwarae drwy gynorthwyo plant i archwilio eu hamgylchedd, rhyngweithio ag ef, sylwi ar newid, gwerthfawrogi byd natur a darganfod yr hyn sydd o’u cwmpas.

Gweithgareddau yn ystod y gwyliau

Rydym yn cynnal gweithgareddau ar benwythnosau ac yn ystod gwyliau ysgol, sy’n cynnwys diwrnodau i’r teulu a chlybiau Sadwrn. Yn ystod y gweithgareddau hyn, rydym yn archwilio ystod o themâu cyffrous er mwyn helpu i wella sgiliau cyfathrebu, rhyngweithio a chwarae.

Symud ac ysgwyd

Sesiwn egnïol sy’n canolbwyntio ar ryngweithio a mynegiant drwy symudiadau a sain. O ioga ysgogol i greu eich cerddoriaeth eich hun, bydd pob wythnos yn archwilio thema wahanol, gyda help ambell westai arbennig.

Straeon synhwyraidd

Mae’r sesiynau straeon synhwyraidd yn canolbwyntio ar ddatblygu sgiliau cyfathrebu. Rydym yn defnyddio gwahanol weadau, teimladau a synau i ymgolli mewn stori a dod â’r stori’n fyw!

Archwilio synhwyraidd

Cyfle i ddysgu mwy am y byd sydd o’ch cwmpas drwy archwilio pob un o’ch synhwyrau. Rydym yn dilyn themâu newydd bob wythnos, felly mae yna weithgaredd at ddant pawb!

Beth sydd yn eich ardal chi?

Rydym yn cynnal sesiynau rhithiol yn genedlaethol yn ogystal â sesiynau wyneb yn wyneb yn Birmingham, Dinbych a Loughborough. Defnyddiwch y cwymplenni isod i gael gwybod beth sydd ar gael yn eich ardal chi.